لو ابنك عنده سنتين ولسه متكلمش | تأخر الكلام عند الأطفال
هنتكلم في موضوعنا عن أكتر الأسئلة الشائعة أو اكتر سؤال بيسأله الأباء والأمهات عن أطفالهم وعن عملية اكتساب اللغة او تطور اللغة لدي الأطفال.
ومن أشهر الأسئلة: ابني عنده سنتين ولسه متكلمش ولا كلمة هل ده طبيعي
ولا لاء؟ لو مش طبيعي ايه اللي ممكن أعمله او ازاي اقدر اساعد طفلي علي اكتساب
اللغة؟ هل لازم اوديه مركز تخاطب او ابدأ معاه جلسات تخاطب ولا استني شويه؟ أوديه
حضانه ولا لاء؟ هل لو اكتفيت ب اني اوديه حضانه هيتحسن ولا لاء؟
علشان نجاوب محتاجين الأول نحدد هل الطفل ده عنده مشكلة في السمع ولا لاء ؟
هل معندوش مشاكل في السمع ( بيسمعك كويس /
بينتبه لمصدر الصوت / بيسمع الاصوات المختلفة مش الأصوات العالية فقط ) لان في
امهات كتير بتغلط ف الجزئية دي فاتبدأ تقول والله انا بلاحظ ان الولد بيسمع مفيش
مشكله ف السمع وبعد كده نكتشف ان الطفل عنده مشكله ف السمع فا حابب اوضح ان السمع
زي البصر يعني ممكن واحد يكون بيشوف بس نظره ضعيف نفس الفكرة بالنسبة للسمع ممكن
الطفل يكون بيسمع بس في مشكله ضعف سمع مثلا او مياه علي الاذن مشكلة تانيه تعوق عملية السمع او
تؤثر عليها.
حاجه تانيه لازم نتأكد منها وهي ان الطفل معندوش مشكلة في الإدراك والفهم
لو بتقوليله افتح التلاجه وهات ميه هيفهم وهينفذ ولا لاء ؟ لو بتقوليله عاوزين نطفي النور هيتصرف ازاي ؟ في أطفال هنلاقي انهم هيروحوا عند مفتاح الاضاءة وفي طفل تاني هلاي انه وقف فوق كرسي وبيحاول يطفي النور وفي طفل تالت هلاقي انه وقف فوق الكنبه وبيحاول يتصرف هنا اقدر اقول ان الولد بيفهمني ومدرك للامور من حوله.
* علاج تأخر الكلام عند الأطفال:
ازاي اقدر أساعد طفلي علي اكتساب اللغة في البيت ؟
هنا الأم تقدر تبدأ تشتغل مع الطفل علي اكتساب اللغة وتقدر تبدأ ب انها تشتري ألعاب تنمية مهارات
( مجسمات : فواكه وخضراوات وحيوانات - مكعبات / حلقات / باذلات باذل الفواكه / خضراوات / حيوانات / وسائل مواصلات / طيور / أشكال هندسية ) صندوق الخرز … الخ ، وتبدأ مع الطفل شغل مستمر.
هتبدأ تلعب مع الطفل بالمجسمات لعب عادي خالص. أهم حاجه عندنا أن الطفل يكون فاهم اننا بنلعب مش بنشتغل ومقعدينه نعذبه. تبدأ تشتغل معاه علي مجسم مجسم من خلال تنفيذ الأوامر البسيطة
(خد - هات - امسك - ارمي) فمثلا هتبدأ تشتغل معاه علي مجسم التفاحه فتبدأ تمسك المجسم وتقوله ( تفاااااااااحه) وتكرر الاسم اكتر من مره وبعدها تبدأ تقوله خد التفاحه فيبدأ الطفل يمد ايده ويمسك التفاحه ترجع تاني تقوله هات التفاحه فيبدأ يديها التفاحه ف ايدها وهكذا.
طيب لو الطفل مش فاهم الأوامر البسيطة بمعني ان الأم بتقوله خد التفاحه بتلاقي ان الطفل مش فاهم الأمر (خد) ولا عارف ينفذه هتعمل ايه ؟
هنا الأم هتبدأ تساعد الطفل يعني لما تقوله خد التفاحه هتبدأ تمسك ايده وتوجهها تجاه التفاحه وتساعده يمسكها وهكذا.
وبعد كده تبدأ تقوله هات التفاحه هتبدأ تمسك ايده وتوجهها ناحيتها وتاخد منه التفاحه وتساعده يديهالها وتكرر التدريب اكتر من مره لحد ما نلاقي ان الطفل بدأ يفهم الأوامر وينفذها وهكذا.
بعد كده ممكن نخلي الطفل يمسك التفاحه ونقوله يلا نرمي التفاحه، ونبدأ نساعده انه يرمي التفاحه. بعد كده نرجه للامر هات التفاحه ونخلي الطفل يجري يجيب التفاحه ويجي يديهالنا.
المهم ان نقوم بتكرار كل التدريب عدد كبير من المرات الي ان نتأكد ان الطفل أصبح قادر علي التعرف علي التفاحه بمعني ان لو وضعت التفاحه ف اي مكان وقولتله هات التفاحه يبحث عنها و يجيبهالي، او لو حطيت التفاحه بين مجسمين تانيين وسألته فين التفاحه؟ او قولتله هات التفاحه يقدر يتعرف عليها ويمسكها ويديهالي ف ايدي.
بعد كده ابدأ اروح للمجسم التالي وابدأ ادربه علي الموزة مثلا اوا الكلب وابدأ انفذ نفس الخطوات اللي نفذناها في التدريب علي التفاحة وافضل اكرر واعيد كتير جدا علي الطفل لحد ما اوصل للنتيجة اللي انا عاوزها.
سؤال مهم : ايه الأهداف اللي احنا هنحققها من خلال ما سبق ؟
هنا بنحقق اكتر من هدف
- الهدف الأول : اننا بنفذ الأوامر البسيطه (خد - هات - ارمي - امسك).
- الهدف الثاني : اننا بننمي اللغة الاستقبالية عنده الطفل وبنساعده يربط اسم الشيء بالمجسم.
- الهدف الثالث : اننا بننمي قدرة الطفل علي التعرف.
- الهدف الرابع : ان الطفل طول الوقت بيسمع الكلام المنطوق من الام.
ولازم اوضح اننا مش هنفضل نسأل نفسنا انا اشتغلت مع الطفل وهو برضو مقالش انا اشتغلت معاه اسبوع وبرضو مبينطقش اللي بيسمعه، احنا هنشتغل مع الطفل وهنبدأ ندخله الكلمات وهنبدأ نلاحظ مع الوقت ان الطفل بدأ يعبر حتي لو ب أصوات او مقاطع بسيطة.
خطوة تانية لازم نشتغل عليها:
وهي تدريب الطفل علي التقليد
هنبدأ بالتقليد الحركي ان انا مثلا هخبط علي المكتب واطلب من الطفل انه يخبط زيي.
ولو الطفل معررفش ابدأ امسك ايده واساعده انه يقلدني.
بعد كده ممكن اصفق والطفل يقلدني او ارفع ايدي لفوق والطفل يقلدني وهكذا.
بعد كده نشتغل علي التقليد الصوتي واكتر حاجه ممكن تجيب معانا نتايج كويسه هي التدريب علي تقليد أصوات الحيوانات.
هبدأ اجيب المجسمات والاعب الطفل بيها وانا بقلد أصواتها يعني مثلا لو بلعب مع الطفل ب الكلب فا هبدأ أقوله كلب كلب الكلب بيعمل ازاي الكلب بيعمل هوهوهو.
مثلا لو بلعب مع الطفل ب الخروف فا هبدأ أقوله خروف خروف الخروف بيعمل ازاي؟ الخروف بيعمل ماااااااااااااااااء ماااااااااااء مااااااااااااااااااااء ويبدأ الطفل يقلدني او يحاول يقلدني.
تقدر تستعين بفيديو يساعدك ف الهدف ده.
لتشغيل الفيديو اضغط هنا
كمان لازم نفهم ان في مجموعة عوامل هتساعدنا في تحديد السن الذي يبدأ فيه الطفل الكلام و وفرة محصوله اللغوي واستخدام هذا المحصول بطريقه وظيفيه سليمه اعرفها من هنا
لو عاوز تعرف اكتر عن علاج تأخر الكلام عند الأطفال اضغط هنا