الطريقة الصحيحة لاستخدام المعززات مع الأطفال

ازاي اقدر استخدم المعزز بشكل سليم و يحققلي كل النتايج الي انا عايزها

هنوضح في مقالنا مجموعة نقط مهمه جدا ولها تأثير قوي جدا في نجاح عملية التعزيز:

1- ثبات التعزيز:

ثبات التعزيز هو ان التعزيز مينفعش يكون ماشي بشكل عشوائي، لازم امشي بطريقه محددة او نظام معين بيتحدد و انا بحط البرنامج الي انا هشتغل بيه مع الطفل.

ببدأ أحدد طريقه التعزيز الي انا هتبعها معاه فهنلاقي التعزيز في البدايه بيكون بشكل مستمر كل ما الطفل بينفذ الهدف الي انا بدربه عليه أعطيه المعزز بتاعه، يعني لو انا بشتغل مع الطفل مثلا علي نطق أصوات معينه الطفل بيستجيب معايا ببدا أعطيه المعزز بتاعه او المعزز الي بيجيب معاه نتيجه.

لما اجي بقي في مرحله تثبيت النطق الصحيح هنا الوضع هيختلف بمعني ان المعزز هنا هيكون متقطع. فلازم أكون محدد الكلام ده من و انا بحط البرنامج الخاص بالطفل لازم اكون عارف ازاي هستخدم المعزز، يعني باختصار و انا بدرب الطفل علي اكتساب اللغه او اكتساب النطق الصحيح هبدأ باستخدم المعزز بشكل مستمر أول ما اجي اشتغل علي التثبيت هاستخدم المعزز بشكل متقطع.



2- فوريه التعزيز:

فوريه التعزيز معناها ان انا لازم أعطي المعزز للطفل أول ما ينفذ الهدف الي انا شغال عليه، يعني الطفل استجاب معايا أقوم بالتنفيذ في الحال فورا أيا كان طريقه التعزيز ال هشتغل بيها أو أيا كان نوع المعزز بس لازم تحصل بشكل فوري.

الطفل مثلا استجاب معايا و نطق الصوت الي انا بدربه عليه ممكن لو انا اتاخرت شويه الطفل يقوم ب أي سلوك تاني في اللحظه دي لو انا أعطيته المعزز الطفل هيفهم ان المعزز علي السلوك الأخير مش علي النطق الصحيح فلازم المعزز يكون فوري علشان اقدر اربطه بالهدف الي انا حققته او بالنطق الي الطفل نطقه او بالسلوك الي انا عديلته أيا كان الهدف بتاعي بقي لازم المعزز يكون فوري اول ما السلوك يحصل بالظبط مينفعش يتاخر ثانيه.

3- كميه المعزز:

النقطه دي ناس كتير اوي بتغلط فيها، لازم تحدد كميه المعزز الي هتقدمها للطفل و تكون الكميه مناسبه للطفل.

ده هيتحدد ازاي؟  هيتحدد علي حسب نوع المعزز الي انت بتستخدمه لازم اخد بالي بردو ان كميه المعزز مش تكون كبيره اوي ولا قليله،  كل ما كميه المعزز كانت مناسبه كل ما ساعدتني في تحقيق الهدف الي انا شغال عليه يعني لو انا شغال علي تصحيح نطق مثلا كميه المعزز المناسبه هتساعدني ان انا احقق الهدف ده مع الطفل.

لازم كمان تاخد بالك ان كميه المعزز لو كبيره اوي فهي هتحقق اشباع للطفل، الطفل هيشبع منها و هتكون بعد كده ملهاش أي فاعليه بالنسبه للطفل مش هتساعدك في أي حاجه هتيجي تديله المعزز هتلاقي عادي زي ما هو متأثرش مش بيتشجع و انا عايز المعزز علشان اشجع الطفل علي النطق السليم او علي تحقيق الهدف الي بدربه عليه فمحتاج طبعا فاعليه التعزيز.

4- درجه صعوبة السلوك:

يعني كميه المعزز لازم تكون مناسبه للهدف او السلوك الي انا شغال عليه، بمعني لو انت مثلا شغال مع طفل علي نطق صوت في مقطع هتديله معزز بنفس الكميه الي هتدهالوا لو انت بتدربه علي نطق جمله من 3 كلمات؟؟!! اكيد لا طبعا لازم كميه المعزز تكون مناسبه للسلوك او الهدف الي انت شغال عليه مع الطفل فلازم بردو ناخد بالنا من النقطه دي.

5- التنويع:

التنويع مهم جدا جدا و طبعا لازم تنوع في المعززات علشان الطفل ميزهقش منك او من المعزز، طيب التنويع ده سهل تحققه؟؟  سهل جدا تحققه لو بتشتغل بمعزز غذائي او معزز اجتماعي هتبدا تنوع في المعززات الي بتقدمهاله فمثلا لو في المعززات الاجتماعيه هتبدا مثلا تخبطله علي كتفه مره تلعبله في شعره مره تقوله برافو شاطر تسقفله الكلام ده كله،  فالازم ناخد  بالنا من التنويع.

6- التجديد:

لازم تجدد في المعزازات بردو علشان الطفل مش يزهق منك فمينفعش تثبت علي شكل واحد من اشكال التعزيز بس اهم حاجه ان المعزز الي بتستخدمه يكون فعال مع الطفل و يكون بيحقق النتيجه الي انت عايزها.