الفرق بين الحرمان البيئي واضطراب طيف التوحد 2023
سوف نناقش العديد من الأسئلة التي كثيرا ما تسألها الأمهات حول أطفالها في هذا الموضوع.
في البداية لازم نفهم باختصار ايه هو الحرمان البيئي وايه هو اضطراب طيف التوحد وليس مرض التوحد.
احنا دايما بنقول ان الطفل صفحة بيضا مين اللي بيسطرها ؟ الأب و الأم و البيئة المحيطة.
لو الأب و الأم منشغلين عن الطفل؟
او مبيتكلموش مع الطفل؟
او لو الطفل ده مبيتعاملش مع أطفال تانيه؟
او مبيتفاعلش مع أطفال تانية؟
هتلاقي ان هو متأخر كتير في الكلام وهنلاقي نطقة متأخر معانا فبالتالي لازم نلاحظ البيئة المحيطة، أغلب الأسر المغتربه بيتكون عندها المشكلة دي او لو الأم مشغولة أغلب الوقت او مش فاضية للطفل والأب في شغله طول اليوم فا ايه العمل ؟ فا هي بتقعد الطفل طول اليوم قدام التلفزيون وتسيبه مع الموبيل او التابلت او التلفزيون. فهنا بنلاقي الطفل متأثر بالشاشات اللي بيستخدمها وعمل بوتقه حول نفسه ومبقاش متفاعل مع البيئة المحيطه ولا حاسس باللي حوالية هو كل تركيزه في الموبيل او التابلت فقط ومبيكتسبش اي حاجه من المحيطين به.
السبب الثاني لتأخر الكلام عند الأطفال والمتعلق بسؤالنا و أصبح منتشر جدا جدا ونحتاج الي تسليط الضوء عليه هو اضطراب طيف التوحد Autism
موضوع التوحد زمان كان نادر جدا وكان ممكن يحصل مره كل مائة الف طفل لكن أخر احصائية بتقول ان التوحد دلوقتي نسبته 56:1 طفل يعني معني الكلام ان كل فصل دراسي فيه طفل شُخص باضطراب طيف التوحد، فا الموضوع اصبح منتشر بقوة.
ايه معني الكلام ده؟
معني الكلام ان انا لازم يكون عندي وعي اكون عارف ايه هو اضطراب طيف التوحد ؟ و ايه أعراض التوحد أو ايه هي السمات بتاعته او ازاي اقدر اتعرف عليها بدري او انا ابني عنده سمات معينه اعمل ايه؟ اتصرف ازاي؟ وابدا التدخل المبكر بتاعي امتي وازاي ؟ اروح لطبيب تخصصه ايه ؟ اروح مركز تخاطب ولا لاء ؟ كل ده لازم يكون عندي وعي بيه.
- قصور واضح في التواصل البصري ( تيجي تكلمه ميبصش ف عينك او يجي يكلمك ميبصش ف عينك ).
- قصور واضح في التفاعل الاجتماعي ( مبيتفاعلش مع حد ).
- عدم التواصل اللغوي ( قصور في التواصل اللغوي ) مبيتكلمش خالص او ميعرفش يعبر عن احتياجاته او مشاعره.
- قصور في التواصل الاجتماعي ( عدم القدرة علي التواصل الاجتماعي ).
- مبيتفاعلش مع الأب او الأم او الأخوه أو بيتفاعل تفاعل ضعيف جدا.
الفرق بين الحرمان البيئي واضطراب طيف التوحد وايه هي أعراض التوحد ؟
لو عندي طفل حرمان بيئي فا هو مبيتكلمش ولو عندي طفل اضطراب طيف التوحد فهو برضو مبيتكلمش انا كأب او أم في البيت ازاي اعرف ابني مشكلته ايه او اعرف ازاي هو طفل حرمان بيئي ولا طفل اضطراب طيف التوحد ؟
في البداية لازم نوضح ان في فروق أساسية بين الحرمان البيئي واضطراب طيف التوحد هنبدأ نسلط عليها الضوء :
- اول حاجه هي التواصل البصري : ان انا لما اجي اتكلم مع الطفل اللي قدامي ده المفروض اني ببص ف عينه فا هو بيبص ف عيني بعد كده ببدأ اعبرله عن اللي انا عاوزه فا طفل الحرمان البيئي بيتواصل بصرايا كويس جدا هو بس مبيتكلمش.لكن طفل التوحد مستحيل او صعب جدا انه يتواصل معاك بصريا هو ممكن يبص ب طرف عينه او نظره جانبيه مش اكتر.
تاني نقطة وهي التفاعل مع البيئة المحيطة : انا هجيب الطفل اللي عنده تأخر في الكلام سببه حرمان بيئي او اضطراب طيف التوحد وابدأ ادخله مع اطفال تانيه واشوف هيتصرف ازاي او لو في حضانه هيتصرف ازاي، طفل الحرمان البيئي بيتفاعل كويس جدا هو مبيتكلمش او مبيعرفش يعبر لكن لو وسط اطفال هيتفاعل كويس جدا هيبدا يلعب هيضرب هيتضرب هيتعامل مع الاطفال ويتفاعل معاهم ويعمل شقاوة ويتعامل بصورة طبيعية.
لكن طفل اضطراب طيف التوحد لا طبعا مبيعملش كده بنلاقي انه له العاب معينه خاصة بيه وطريقته الخاصو ول في اطفال مبيروحش ناحيتهم ولا بيتفاعل معاهم ولو راح ناحيتهم برضو مش هيتفاعل معاهم.
مفيش تفاعل خالص في البيت مع الأب و الأم بالنسبة
لطفل اضطراب طيف التوحد لكن طفل الحرمان البيئي بيتفاعل كويس لو اديتله اوامر
بسيطه بينفذها تلاعبه يضحكلك ويروح ويجي معاك ويتفاعل بشكل طبيعي جدا جدا وعنده
فهم للكلام المسموع من الاب والام لكن هو مبيتكلمش.
- الطفل اللي عنده حرمان بيئي او اضطراب
طيف التوحد لو عاوز حاجه هيعمل ايه ؟
طفل الحرمان البيئي هلاقي انه لما بيعوز حاجه بيشاور علي الحاجه دي فابالتالي انت بتعرف هو عاوز ايه عن طريق الاشارة او انه يشاور عالحاجه اللي هو عاوزها والاشاره بتتبر علامه للنضج الاجتماعي يعني مؤشر كويس لكن طفل التوحد بلاقي انه مبيعملش كده هلاقي انه لو عاوز حاجه بيبدأ يعيط ويصرخ ويدبدب في الارض لحد مانت تفضل تفكر هو عاوز ايه وتجيبهوله فا يبدا يسكت او طفل تاني الاقي انه بياخد ايدك ويروح بيك لحد الحاجه اللي هو عاوزها او المكان اللي هو عاوز منه حاجه فا دي نقطة هامه جدا للتفرقة بين الحرمان البيئي واضطراب طيف التوحد.
طيب لو انا اتأكدت ان طفلي متأخر لغويا بسبب الحرمان البيئي ايه اللي ممكن اعمله او ازاي اقدر اساعده بطرق بسيطة وسهله وفعاله؟
- نقطة تانيه وهي نقطة الكلام : طفل الحرمان البيئي بلاقي انه ممكن يتكلم كلمتين او ثلاث كلمات والأهم انه بيكون قاصد الكلمة اللي بيقولها يعني بيقول ماما وهو فعلا محتاج مامته او بينادي مامته او بيقول بابا وهو عاوز باباه يجيله او يلب معاه او يروحله وهكذا، لكن طفل اضطراب طيف التوحد غالبا مبيكونش بيتكلم ولو اتكلم مبيكونش قاصد الكلمة اللي بيقولها يعني يقول ماما وهو ميقصدش مامته او م محتاج مامته او يقول باباه وباباه مش موجود اصلا يعني مبيكونش يقصد الكلام اللي بيقوله .
نقطة تانيه مهمه جدا : وهي الانتباه للاسم : طفل الحرمان البيئي لما اناديه ب اسمه بلاقي انه بينتبه او يبصلي او يجيلي معني كده انه سمع اسمه ومنتبه ليا او باصص ليا او بيعبر عن سماعه لاسمه بالالتقاء البصري ده.
لكن طفل اضطراب طيف التوحد مهما ناديته ب اسمه هو مبينتبهش ولا بيبصلك ولا يجيلك تناديه مره واتنين وتلاته وعشره ولا يبصلك ولا اي حاجه ولا في اي استجابة ولا في ي تفاعل يدل علي انه سامع اسمه.
فانا هبدأ اشوف طفلي بقي ابني مثلا التفاعل بتاعه مع الاطفال كويس بيلعب وبيتفاعل مع الاب والام و عارف اسمه لما بناديه بينتبه او يبجيلي ولما بيجي يعبر او لما بيحتاج حاجه بيشاور عليها وبلاقي انه بيقدر او بيتواصل معانا بصريا بشكل جيد يبقي انا كده طفلي متأخر بسبب الحرمان البيئي.